కంగనా, విజయేంద్ర ప్రసాద్ ల ‘అపరాజిత అయోధ్య’

అయోధ్య రామమందిర నిర్మాణం ఆధారంగా ప్రముఖ రచయిత, ‘బాహుబలి’ ఫేం విజయేంద్రప్రసాద్‌ రచించిన ‘అపరాజిత అయోధ్య’ అనే సినిమాకు కంగనా రనౌత్‌.. నిర్మాత బాధ్యతలతోపాటు దర్శకత్వం కూడా చేయనుంది. ఈ ప్రాజెక్ట్‌ గురించి కంగనా సోదరి గత నవంబర్‌ నెలలోనే అధికారికంగా ప్రకటించింది. ‘సినిమాకు దర్శకత్వం వహించాలన్న కోరిక నాకు లేదు. కాన్సెప్ట్‌ స్థాయి నుంచి పనిచేసి ఒక ప్రాజెక్ట్‌గా దీన్ని ప్రారంభించాను. దీన్ని మరో దర్శకుడితో నిర్మించాలనుకొన్నాను. ఇదే సమయంలో నేను చాలా బిజీగా ఉన్నాను. విజయేంద్రప్రసాద్‌ రచించిన ఈ సినిమా కథ పెద్ద కాన్వాస్‌పై చెయ్యాల్సిన చిత్రంగా భావిస్తున్నాను. నా సహచర భాగస్వాములు కూడా నేను దర్శకత్వం వహించాలని ఆసక్తిగా ఉన్నారు. చివరకు నేను ఈ చిత్రానికి దర్శకత్వం వహిస్తే బాగుంటుందని భావించాను‘ అని ఒక ప్రకటనలో కంగనా రనోత్‌ తెలిపింది.

విశేషం ఏమిటంటే .. ఈ చిత్రంలో కంగనా నటించడం లేదంట. ఈ సినిమాను చక్కటి దృశ్యకావ్యంగా మలిచేందుకు సర్వశక్తులు ఒడ్డి పనిచేయాలని నిర్ణయించుకొని.. ఈ సినిమాలో నటించడం లేదంట. ఈ కథంశం వివాదాస్పదమైంది కాదని.. ప్రేమ, విశ్వాసం, ఐక్యత కథాంశం.. అన్నింటికి మించి దైవాంశంతో ఉండే ఈ ప్రాజెక్టును ముందుకు తీసుకెళ్లేందుకు ఆసక్తిగా ఎదురుచూస్తున్నానని చెప్పింది కంగనా రనోత్‌. ఎన్నో ఏండ్లుగా వివాదాస్పదంగా ఉన్న రామజన్మభూమి-బాబ్రీ మసీదు కథాంశంతో సినిమా అనేసరికి ..సినిమా ఎలా ఉండబోతున్నదో? అని సినీ పరిశ్రమ వర్గాలు ఆతృతతో ఎదురుచూస్తున్నారు

నటిగా నేను సక్సెస్‌ అయ్యాను. సినిమాలు చేస్తున్నాను. నేను కూడా ఓ ప్రొడక్షన్‌ హౌస్‌ ప్రారంభించాను. భవిష్యత్‌లో డిజిటల్‌ వైపు వెళ్లేందుకు కూడా సిద్ధంగానే ఉన్నాను. సృజనాత్మకత కలిగిన వ్యక్తిగా నేను సాధించాల్సింది, నేర్చుకోవాల్సింది చాలా ఉందని నాకు తెలుసు’’ అని చెప్పింది కంగనా రనౌత్‌. ఇక సినిమాల విషయానికి వస్తే.. ‘తలైవి’, ‘తేజస్‌’, ‘థాకడ్‌’ అనే మూడు లేడీ ఓరియంటెడ్‌ సినిమాలు కంగనా చేస్తోంది.