వరుస కష్టాల ‘టాక్సీవాలా’కు ‘లీకు’ సెంటిమెంటే ‘శ్రీరామ రక్ష’ !

‘అరవింద సమేత వీర రాఘవ’ కేసు కొలిక్కిరాకముందే మరో సినిమా ‘ట్యాక్సీవాలా’ వంతు వచ్చింది. ఆ చిత్రానికి సంబంధించిన నిర్మాణ దృశ్యాలు లీక్‌ కాగా… ఈ సినిమా ఎడిటింగ్‌ సైతం కాకముందే హెచ్‌డీ ప్రింట్‌ నెట్‌కెక్కింది. నిర్మాణ సంస్థ ఫిర్యాదు మేరకు సోమవారం కేసు నమోదు చేసుకున్న సిటీ సైబర్‌ క్రైమ్‌ పోలీసులు దర్యాప్తు చేపట్టారు. విజయ్‌ దేవరకొండ ‘ట్యాక్సీవాలా’ షూటింగ్‌ పూర్తి చేసుకుని ఎడిటింగ్‌కు సిద్ధమవుతోంది. వచ్చే నెలలో విడుదల చేసేందుకు సన్నాహాలు చేస్తున్నారు. ఈ నేపథ్యంలోనే హెచ్‌డీ ప్రింట్‌తో పూర్తి సినిమాను యూట్యూబ్, ఫేస్‌బుక్, ట్విట్టర్, ఇన్‌స్ట్రాగామ్‌లో గుర్తుతెలియని వ్యక్తులు అప్‌లోడ్‌ చేసి వైరల్‌ చేశారని నిర్మాణ సంస్థ గుర్తించింది. దీంతో వారి ప్రతినిధి సానం నాగ అశోక్‌కుమార్‌ సైబర్‌ క్రైమ్‌ పోలీసులకు ఫిర్యాదు చేశారు. . ఇటీవల విడుదలైన ‘గీత గోవిందం’ సినిమా కూడా లీకైన విషయం తెలిసిందే. ‘అత్తారింటికి దారేది’ తో సహా ఇటీవల ‘లీక్’ అయిన సినిమాలన్నీ విజయవంతం కావడం విశేషం. ఆకోవలోనే  ‘టాక్సీవాలా’ కూడా హిట్ అవుతుందేమో. అందుకే ..వరుస కష్టాల ‘టాక్సీవాలా’కు ‘లీకు’ సెంటిమెంటే ‘శ్రీరామ రక్ష’ !.. అని పరిశ్రమలోనివారు  కామెంట్ చేస్తున్నారు.