“అవతార్” తొలి భాగంతో మోషన్ క్యాప్చర్ అనే సరికొత్త టెక్నాలజీని ప్రపంచ సినిమాకు పరిచయం చేసిన దర్శకుడు జేమ్స్ కామెరాన్ త్వరలో రానున్న సీక్వెల్స్‌తో మరో ప్రయోగానికి తెరతీసినట్లు సమాచారం.జేమ్స్‌కామెరాన్ అద్భుత సృష్టి “అవతార్”. అత్యుత్తమ సాంకేతిక పరిజ్ఞానంతో రూపొందిన ఈ చిత్రం ప్రపంచ వ్యాప్తంగా సంచలనం సృష్టించింది. 2009లో వచ్చిన ఈ సినిమాకు ప్రస్తుతం వరుసగా నాలుగు సీక్వెల్స్‌ను తెరకెక్కిస్తున్నారు.
త్రీడీ టెక్నీలజీతో రూపొందిన చిత్రాల్ని ప్రత్యేకమైన కళ్లజోడు ద్వారానే త్రీడీలో చూడగలం కానీ “అవతార్-2” చిత్రాన్ని మాత్రం ఎలాంటి త్రీడీ గ్లాసెస్‌ను ఉపయోగించకుండా త్రీడీలో వీక్షించే విధంగా రూపొందిస్తున్నారని తెలిసింది. అత్యంత భారీ బడ్జెట్‌తో నిర్మితమవుతున్న “అవతార్” సీక్వెల్స్ కోసం ఆర్‌జీబీ అనే కొత్త టెక్నాలజీని వాడుతున్నారని, దాని కారణంగానే ఎలాంటి త్రీడీ గ్లాసెస్‌ను ఉపయోగించకుండా ప్రేక్షకులు ఈ చిత్రాన్ని చూడొచ్చని హాలీవుడ్ వర్గాల సమాచారం. ఈ సాంకేతికను ఉపయోగిస్తున్న తొలి సినిమా ఇదే కావడం విశేషం. కాగా ఈ చిత్రాన్ని 2020 డిసెంబర్ 18న విడుదల చేయడానికి సన్నాహాలు చేస్తున్నారు.
